2017 東京近郊賞楓之旅: Day4~箱根溫泉之旅(上)

14 November 2017 (Tue)

到咗今次旅行嘅重點行程…就係兩日一夜嘅箱根溫泉之旅，加入住有私人風呂嘅温泉旅館。

小田急車站食早餐

今日又係坐小田急，我一早已經買定兩天箱根周遊卷，另加小田急“浪漫特快”。坐浪漫特快，從新宿出發可以直達「箱根湯本」站，途中無須轉乘，又快又方便， 車程大約85分鐘。 用「箱根周遊券」可以搭八種交通工具遊箱根，包括鐵路、登山電車、登山纜車、空中纜車和海賊觀光船等，去箱根有點上山下海嘅感覺。 

遊箱根的路線，我係參考小田急「箱根2日遊」的建議行程。

「早川」河

「繡球橋」

「強羅車站」

抵達「箱根湯本」後，我地先到「早川」河上的「繡球橋」睇下。 之後要轉搭「箱根登山電車」前往終點站「強羅車站」。 達強羅已經中午時分，又係搵食時間， 車站附近餐廳唔多。

我地4人都係食親子丼，店員都係上咗年紀啲叔叔阿姨，年紀比我父母更大，佢地都應該過咗七八十歲。 我老豆就話日本人真係好勤力，佢地噤大年紀都重未退休。強羅係鄉郊地方，我估後生仔女一定出了東京打工， 唔會想留係鄉下地方工作，所以佢地年紀大都會繼續做。 不過餐廳好早收， 我見到兩點有客人想入黎食午飯，店員立即話佢地知已收，唔接受新客。 

原本我想去參觀雕刻之森美術館，聞說美術館環境優美，又展示咗好多雕刻品同藝術品。 不過冬天比較早黑，唔夠時間去晒雕刻之森美術館和強羅公園兩個地方。 紅葉季節，我地都係決定去強羅公園欣賞紅葉，大家都係不停影相，比我預計花多咗時間係強羅公園。 

係強羅搭箱根登山纜車到「早雲山」，到了「早雲山」要改搭箱根空中纜車才能到「大湧谷」。 
空中纜車共有四個站，分別係早雲山車站⇢大涌谷車站⇢姥子車站⇢桃源台車站，這段要坐約30分鐘。 一出大湧谷車站就聞得到濃濃硫磺味，而且好大風。 

大湧谷名物”黑玉子”

大湧谷係一座萬年火山口，不斷有蒸氣同硫磺係火山口噴出，整個大湧谷都係煙霧瀰漫。 原本大湧谷係有一段山路可以走，可以近距離欣賞大湧谷嘅獨特地貌。我估煙霧太大，所以當日冇開到。四周也被籠罩於煙霧中，只見到少許富士山。 大湧谷名物”黑玉子”，據說食一粒可以延壽七年， 一場黎到我地又買包食下。其實黑玉子就係正常蛋嘅味道。 

抵達「桃源台車站」已經四點多了，係旅遊服務中心請職員幫助 call 的士到温泉旅館「 星のあかり」。原來旅遊中心外有個電話直接連接到的士台，不過我地唔識日語，接到的士台都應該只會雞同鴨講，好彩我地早到一步，中心職員幫我地call 的士就已經夠鐘收工。 

電話可以直接連接到的士台

到達「 星のあかり」，天都黑，浸温泉時已經睇唔到個湖景。 其實我原本想四點前到達温泉旅館，不過團友們實在太愛影相，每個景點都逗留太耐。 

箱根住宿詳情可以睇: 2017東京近郊賞楓之旅~住宿篇(2) ~ 星のあかり(Hakone star Akari) 

Next: 2017 東京近郊賞楓之旅: Day5~箱根溫泉之旅(下) 

Previous: 2017 東京近郊賞楓之旅: Day3~初登高尾山賞楓(下) 

 Face Book Page: 波太的簡單生活