2017 東京近郊賞楓之旅: Day3~初登高尾山賞楓(下)

13 November 2017 (Mon)

離開藥王院，再步行約20分鐘充就到山頂。山頂的楓葉已經完全轉紅，好幸運可以見到噤靚嘅紅葉。

之前唔清楚山頂有冇午餐食，一早係火車站買定咗麵包，一家人就跟日本人一樣坐係亭下食麵包。 原來山頂有2間小吃賣店售有高尾山有名的「山藥泥蕎麥麵」，咁我地又每人食咗碗蕎麥麵，我都係第一次食山藥泥。山藥泥質地黏黏滑滑咁，冇乜味道，不過好有益。

山藥泥蕎麥麵

今日天氣好，可以見到富士山。

4號路線下山

4號路線~吊橋

其實上高尾山有6條不同的路線可以選擇，我地就選擇不經藥王院的4號路線下山，唔行回頭路。4號路線要行山路，不過唔太辛苦，重可以行吊橋。

3串糰子小食

行到“十一丁目茶屋”，我地買了3串糰子小食。天狗燒、山藥蕎麥麵、糰子都係高尾山必吃美食，我地全部都食過。

我地選擇搭纜車下山，係排隊嘅時候，又買了之前係香港紅了一陣子嘅芝士撻。我真係估唔到係日本行山會有噤多嘢食，感覺我冇停止過食嘢。

到達山腳，我地沿住藥王院的表參道商店街走走，表參道兩側有許多間蕎麥麵專賣店，2位團友又買了雪糕食。最後走到“TAKAO 599 MUSEUM” 。

高尾山高599公尺，所以博物館名為“TAKAO 599 MUSEUM” (高尾599博物館)。博物館展示咗多種係高尾山可以見到嘅植物同係高尾山棲息嘅昆蟲標本。

離開高尾山，乘坐京王線回新宿。大家行完山都好倦吓，一上火車就瞓。瞓晒大家又好似叉番電咁，番到新宿又好精神咁去shopping。

食和幸做晚餐。

高尾山折扣乘車券:

https://www.keio.co.jp/chinese_t/tickets/discount.html

Next:  2017 東京近郊賞楓之旅: Day4~箱根溫泉之旅(上)

Previous:  2017 東京近郊賞楓之旅: Day3~初登高尾山賞楓(上)

 

Face Book Page: 波太的簡單生活

2017 東京近郊賞楓之旅: Day3~初登高尾山賞楓(上)

13 November 2017 (Mon)

高尾山口車站有小木屋的感覺，設計得幾靚，好有日本風feel!

原本我今次旅行冇諗住去高尾山，一早將高尾山係個行程到剔除咗。因為我好怕行山，好驚好似上次去宮島上彌山咁行到腳痛，加上今次同父母一齊，唔知佢地行唔行到。 Plan行程同時已經問咗波生，佢都同意話唔去。

但係出發前幾日，波生睇到報紙介紹高尾山，佢覺得好靚又有吊椅坐，佢又問番我，我地今次係咪會去高尾山 (吓…之前又話唔去!) 。 我問過父母係咪可以應付到行山之後，最後我又加番高尾山入行程到，取消去橫濱。

今日又係一早出發，先到京王KEIO新宿站買車券，要搭8:03am班車。 去高尾山，可以買「高尾山折扣乘車券」(電車來回乘車券＋纜車或吊椅的來回乘車券) ，高尾山折扣乘車券價格￥1380，相等於正價車券嘅8折。

京王新宿站其實就係小田急電鐵站隔離，由京王新宿站坐京王電鐵(京王線)到高尾山口大約1小時。因為係上班時間，所以頭半個鐘都要企。

藥王院的石碑

高尾山一向都係賞楓名所，走到藥王院的石碑就已經見到好多紅葉，好靚呀! 我地選擇先搭吊椅上山，可能比較早，完全唔洗排隊。回程時我地搭纜車，纜車路兩旁的楓葉仍未轉紅，所以我覺得搭吊椅好玩D! 坐雙人吊椅其實都幾刺激，因為吊椅唔會停，上落時一定要留意職員俾的指示。

雙人吊椅

坐吊椅尾段會有個影相位，到達山上車站 ，職員會show張相比你睇，我阿爸勁喜歡張相，完全唔洗諗就俾錢，重買埋我同波生果張相，我記得好似￥1300/2張，買2張平少少。

登上路線

開始登上，我地沿著最熱門的1號路線經過藥王院一路走到山頂。 距離吊椅站不遠，有天狗燒賣，立即買了4個，天狗燒外皮酥脆，裡面的黑豆餡大大粒，我覺得好好味。

天狗燒

繼續走，就會見到一棵巨大的杉樹，旁邊還有一座章魚石雕，這棵有450年歷史的老杉就係 「章魚杉」。大家都摸下個章魚石雕，可以保幸福。

巨大的杉樹

章魚石雕

六根清淨輪

另外，有個六根清淨輪，黑球刻著「身」，紅字的石輪可以轉動；摸過黑球後再轉動下方石輪可以祈福。好過癮!

在通往藥王院的參拜路上有個岔路，左邊通往緩斜山坡路的女坂，右邊則是108個石階的男坂。我地選擇了走女坂上藥王院。係參拜路，沿路都有多個六根清淨輪，黑球刻著不同的字。

藥王院

步行約30分鐘，就到達藥王院。  藥王院寺廟有許多消災解厄的參拜處，售賣各式各樣定的御守，非常熱鬧。不過波生就覺得藥王院太過商業化。

藥王院的楓葉非常美。

Next:  2017 東京近郊賞楓之旅: Day3~初登高尾山賞楓(下)

Previous:  2017 東京近郊賞楓之旅: Day2~ 鐮倉一日小旅行 (下)

 

Face Book Page: 波太的簡單生活

油拔法 Oil Pulling + iherb快閃89折優惠 (新舊客戶適用)

最近受波生影響， 我開始了每晚黎一次油拔法。早前喉嚨痛，食西藥又幫助不大，波生就推介我一定要試下油拔，做完油拔之後發現喉嚨真係冇噤痛。 油拔法就係每日以椰子油漱口，據說可以美白排毒。

其實幾年前我都試咗一排油拔法， 當時養生達人嚴浩大力推，不過當時我係用有機冷壓葵花籽油（因為嚴浩推介用），不知什麼原因停了沒有繼續。 椰子油含有相當好的健康脂肪，可以生食，所以就算係油拔期間， 唔小心吞咗啲油都唔會對身體有影響。

今次改了用椰子油黎做油拔法，感覺比用葵花籽油易入口。 加上我家一直都係用椰子油煮食，唔洗額外買多枝油，令我更易實行油拔法。

油拔法是係指每天起床後用油漱口 15 至 20 分鐘，每次大約用一湯匙油 （15ml）。 漱完吐出油，啲油通常會變成奶白色，之後再擦牙。不過我朝早冇時間， 所以我改每晚做。

油拔法係源自古印度，流傳幾千年的天然排毒療法。 油拔法的好處是可以把口腔內的細菌帶走，因為人的口腔有多達 10 億種的細菌、病毒、黴菌、寄生蟲和毒素細胞等，呢啲細菌最喜歡係口腔內嘅角落積聚繁衍。 長期實行油拔法可以增強免疫十力， 病痛都少啲。

油拔法選用的油一定要是優質的食油，而且最好是有機冷壓椰子油。椰子油好處多多，我之前已經係blog 介紹過椰子油，有興趣可以睇番 (食油安全問題~椰子油推介) 。

屋企啲椰子油近排用得勁快，我係iherb 買咗一隻Garden of Life 有機冷壓椰子油 ，真係又平又好用。 我通常都係買細樽，因為由美國山長水遠運黎香港，細樽比較安全，個樽唔會噤易壓爆！

Garden ofLife Raw Extra Virgin Coconut Oil購物連結

Ingredients: Organic Expeller Cold-Pressed Coconut Oil

遇啱今次Iherb有世界杯快閃89折優惠，我決定大量購入椰子油，一次買6枝，因為買6枝以上重有額外7.5%折扣。。

大家可以係購物車裡輸入 promo code "LSJ555" ，之後再輸入 " WCELEVEN"，或直接 click 下面條link 立即享有89折 (新客戶另可享有額外95折優惠)。

https://www.iherb.com/?pcode=WCELEVEN&rcode=LSJ555

Iherb世界杯快閃89折優惠，新俾舊客戶都適用，每個客戶只可享有一次機會 ，優惠截至港台時間6月28日凌晨1點。

2017 東京近郊賞楓之旅: Day2~ 鐮倉一日小旅行 (下)

12 November 2017 (Sun)

和彩八倉

魩仔魚飯

離開長谷寺，我地坐電鐵去鎌倉站…又到咗午飯時間，黎到鎌倉，一定要試下江之島的名物魩仔魚飯，我地去咗係若宮大路果間 “和彩八倉”。

 若宮大路係前往鶴岡八幡宮的參拜之道。

鶴岡八幡宮

結婚

其實我覺得鶴岡八幡宮冇乜特别，不過地方好大。 今日應該有節慶，參拜的人非常之多，有人結婚，同埋好多穿和服的小朋友。
　

蒟蒻皂~我都買了

離開鶴岡八幡宮，經小町通商店街行番去鎌倉站，沿路上有好多特色小店/手信店，非常熱閙，我地個個都買咗唔少手信。

最後一站係江之電”極楽寺駅”， 極樂寺駅是「關東車站百選」之一，之前我睇<海街日記>電影都經常見到此站。

回程冇book「小田急浪漫特快」，我地坐江之電到藤澤站，轉乘小田急電鐵番新宿。

新宿高島屋「ふきぬき」

晚餐~ 新宿高島屋「ふきぬき」鰻魚飯

Next:  2017 東京近郊賞楓之旅: Day3~初登高尾山賞楓(上)

Previous:  2017 東京近郊賞楓之旅: Day2~ 鐮倉一日小旅行(上)

 

~住宿篇~

新宿(3晚) ホテルグレイスリー新宿 (Hotel Gracery Shinjuku)

-->箱根(1晚) 星のあかり (Hakone star Akari)-->新宿(2晚) ホテルグレイスリー新宿 (Hotel Gracery Shinjuku)

Face Book Page: 波太的簡單生活

2017 東京近郊賞楓之旅: Day2~ 鐮倉一日小旅行 (上)

12 November 2017 (Sun)

今次旅行，每日都好早出發，因為冬季比較早天黑，加上我地要去東京近郊，所以都係早去早回比較好，番到新宿重有時間 shopping。

今日要搭8.10am果班車, 7.30am前已經出發到新宿小田急電鐵站。 見有時間，我地就係小田急電鐵站附近餐廳食個快早餐，我地立食咗碗麵做早餐，立食都係我人生第一次。

早餐~立食餐廳

小田急浪漫特快

早一日，我已經先買咗小田急電鐵 Odakyu「江之島-鐮倉周遊券 」(￥1,470), 因為怕冇位坐又唔想父母噤辛苦一朝早就要企，所以我去程加咗￥620買埋「小田急浪漫特快」車票。

片瀨江之島站

江之島

坐咗一個小時就到片瀨江之島站，片瀨江之島站好似日本童話「浦島太郎」嘅「龍宮」，不過今次我地唔係去江之島，其實我都好想去埋江之島，但係一日去晒江之島同鐮倉會好趕, 都係留番下次先去江之島。

首先我地係影下個龍宮火車站，之後就慢慢行，行咗大約10分鐘就到達江之電江之島站。江之島站嘅小鳥，好cute 呀! 聽講佢地季季都會著唔同衫。

江之電江之島站嘅小鳥

坐江之電到長谷車站，跟住人潮走，第一站去高德院，睇下青銅製嘅鐮倉大佛。 我雖然唔係佛教徒，不過我好鐘意大佛，大佛個樣好慈祥，我覺得見到佢之後會好安心！

鐮倉大佛高13.35米，日本第二大。

俾多￥20，就可以入去大佛裡面睇下大佛嘅結構。

大佛銅鑼燒

長谷寺

再到長谷寺，睇木制觀音像。長谷寺面積都幾大，有庭園流水，沿路上觀音堂，會見到好多地藏。觀音堂裡頭供奉嘅係十一面觀音菩薩本尊像，呢個觀音像係木制，高度達9.18米，係日本歷史上有記載以來最大嘅木像。不過觀音堂唔可以影相。

長谷寺裡有好多觀音像，我發現日本觀音都係男兒身。

「摸摸大黑天」

據說摸了就能添好運的「摸摸大黑天」。

從長谷寺上可以眺望到鎌倉大海。

”弁天窟” 洞穴

另外， 長谷寺有個叫做”弁天窟” 嘅洞穴，弘法大師閉關齋戒的洞穴，要蹲低身行入去，我覺得都幾得意。

Next:  2017 東京近郊賞楓之旅: Day2 ~ 鐮倉一日小旅行(下)

Previous:  2017 東京近郊賞楓之旅: Day1 ~ 新宿

~住宿篇~

新宿(3晚) ホテルグレイスリー新宿 (Hotel Gracery Shinjuku)

-->箱根(1晚) 星のあかり (Hakone star Akari)-->新宿(2晚) ホテルグレイスリー新宿 (Hotel Gracery Shinjuku)

Face Book Page: 波太的簡單生活