年尾還太歲@圓玄學院

15 Jaunary 2017 (Sun)

又就快到農曆新年，今年年頭去了蓬瀛仙館攝太歲  （有興趣可以睇番：初二攝太歲@蓬瀛仙館)，年尾又係還太歲嘅時候，今次去圓玄學院。

其實我係十幾年前開始已經有去圓玄學院拜太歲嘅習慣，想當年剛剛出黎做嘢，運氣麻麻，又同男友分手，所以好朋友就叫我一齊拜太歲，就係咁我就開始差不多年年都去，基本上冇犯太歲都會照去，買個安心。

雖然想當年好年輕，不過朋友對拜神嘅事好熟。這個朋友之後結緍生仔，冇時間再陪我去，近年重已經改信了主，更加唔會再去。之後我就開始同另一個朋友去，不過佢都已經係四年前移咗民。 所以近這幾年我就開始同老公波生去，今次都係佢提我，我先記得要還太歲！因為好多時，我都係年頭一次過做晒兩樣嘢，還同拜太歲，不過咁做，波生話唔夠誠意，所以佢話要分兩次去 。

小巴站係兆和街~81号綠van

圓玄學院係荃灣三疊潭，係山上面，可以坐81号去“老圍”嘅綠van到總站落車，車程大約15分鐘。小巴站係兆和街，好近千色店。 通常都係等車耐過坐車，年尾都幾多人去還太歲，今次都排隊排咗差不多半句鐘先上到車。年頭會更加多人，要排一個鐘以上，所以四個人就坐的士好過。或者行上山，其實都唔太難行。

圓玄學院買太歲衣及清香嘅地方

至於拜太歲嘅步驟各有不同，不過可以參考本人嘅做法：

1. 先買太歲衣及清香(我就係圓玄學院到買，不過小巴站都有幾間舖頭賣)。 太歲衣有張“酬謝文”(“酬謝文”係還太歲用的，如果係攝太歲，就會係“祝禱文”)，職員會問你邊年出世，幫你寫低本命太歲和當太歲嘅號碼 (2016年係33號管仲太歲) ，之後會叫你係酬謝文到寫低自己個名。

太歲衣及細清香 (照片取自網上) ~太歲衣$23，香一扎$5 (大細香都係$5，大香係三支一包)

2. 在殿外香爐上香。

元辰殿(太歲殿)

3. 進入元辰殿(太歲殿)內，參拜太歲統領“斗姥元君”。 入元辰殿係唔可以帶點咗嘅香。

元辰殿內(照片取自網上)

4. 拜當年的太歲，並祈福許願。

5. 拜自己出生年份的太歲(本命太歲)。

6.  之後向其餘58位太歲參拜， 通常要排隊，由1號太歲位置開始排，逐一上香。

7. 祈福完畢，攜太歲衣到焚化爐焚化。

焚化爐

圓玄學院:
http://www.yuenyuen.org.hk/