22 Oct 2023 (Sun)
今日最後一天，下午就要出發去機場。
星期日的波蘭，同死城冇分別，因為除了旅遊景點和一些餐廳會營業，其他商店基本上都係唔開門，只有車站裡面的少量鋪頭會開。
原本打算在離開華沙前，登上位於華沙科學文化宮 (Palace of Culture and Science) 30樓的觀景台看風景，文化宮地點好近酒店，而且星期日都開放。
但因為今日落大雨，到觀景台都應該唔會看到任何華沙市的景色，所以最後我哋只去了車站附近的Złote Tarasy商場逛逛，但基本上成個商場只得幾間餐廳有在營業。
見到Costa Coffee 有開門，我哋就入去坐下，嘆柸咖啡。飲完咖啡，再行完個吉的商場，就返回酒店等夠鐘check out。
酒店樓下有一間便利店，今日都開，所以就入去買零食。點知買零食的時候，我留低咗把我好鍾意的雨傘喺便利店，當我發現冇咗把傘已經立即落去搵，但已經俾人攞走咗。(諗起都仲覺得傷心!)
叫酒店幫我call的士去機場，終於第一次坐到波蘭跳標的士。平時自己根本唔會call唔到呢種的士。的士費好平，車程大約二十幾分鍾，記憶中去到機場都係大約70 PLN。
在機場食熱狗做lunch
回程又係先由華沙到多哈機場，再轉機返回香港。但個人覺得在多哈機場轉機唔太方便，因為上機和落機都係要坐shottle bus。原本以為轉機時間有兩個鐘頭，我應該有充足時間在多哈機場買手信。
但因為落機要坐shuttle bus，我哋係機上等咗好耐先排到上到shuttle bus， 回到航空大樓，再快步走去到轉機gate 口，已經剛好在boarding，最後完全冇時間係機場行下，只有時間去個廁所。上機又要坐shuttle bus，班機好大，上機又係要等好耐。
疫情之後，每次去歐洲都要轉機，我發現其實坐中東三寶呢啲大機都冇乜着數，因為班機大，通常要預早好多時間就開始boarding。要成機乘客都上曬機，基本上係要用好多時間，落機一樣要用好多時間。
但坐Qatar 都有好處，就係食咗3次飛機餐，撇除唔好講好唔好食，但一定唔會肚餓。
22/10/2023 WAW → DOH 17:40 to 00:10 (5h 30m)
(Connection Time 1h 40m)
23/10/2023 DOH → HKG 01:50 to 15:05 (8h 15m)
P.S.
之前有提及過，在到達華沙當天，我個喼就已經冇咗一個轆。第二天，我喺書局買了牛皮膠紙，將冇咗個轆而爛咗嘅位置用牛皮膠紙貼好。今次整個行程，我個喼都係靠3個轆而行，但都冇影響的我推住佢周圍走。
No comments:
Post a Comment