我人生第一次擁有自己的物業，真是好開心! 2014年年尾買的樓花，在2015年11月已經收樓
。
回想起當時, 由睇示範單位，交表到買樓，其實只是短短的一星期，我們沒有用很多時間去考慮就買了。
2014年12月，我在報紙上得知有個新樓盤即將開賣，我見樓盤地點是在市區，
所以就同波生提議不如去睇下，因為住市區一直都是我的夢想。其實我只是想睇下，冇諗過真係會買。
波生就在我建議下和我去了睇示範單位。 到達示範單位周邊，已經有好多地產代理等客，個個地產代理都會問你是否來睇樓，然後遞卡片俾你。俾太多人包圍住，都唔知應邊個好，所以波生就行遠少少，之後就在沒太多經紀的位置接了一個地產代理的卡片，然後就跟他去了睇示範單位。我估行則應該是，當你俾一大班代理包圍住，只要你接其中一個的卡片，你就是那個人的客。
唔洗排好耐(半小時到)，就入到去睇示範單位。首先要睇段介紹樓盤的影片(一定要睇)，之後先可以睇樓盤模型和示範單位。
 |
| 示範單位 |
睇完示範單位，地產代理就帶我們到一家茶樓到坐(地產代理的公司“世紀21”在茶樓包了一間房) ，講解下樓盤的銷售安排。 買新樓是要抽籤的，因為揀單位的優先次序是以抽籤方式決定，所以如果抽到個大號碼，買到心水單位的機會就好細。我和波生決定遞交認購申請表，試下抽籤，抽到籤先再諗。
基本上，地產代理會有一條龍服務。遞交認購申請表是要同連一張15萬的本票， 不過原來唔洗自己準備本票，因為地產代理(世紀21)已經預備了好多張本票俾客人入表用。因為地產代理幫你出了15萬的本票，所以地產代理會要求你碌番15萬卡數，不過唔會過數住，地產代理只會在你真的買了樓後才會過數。
番到屋企，我和波生就計下我們可以俾到幾多錢首期，之後再揀我們的心水單位。
樓盤是單楝式，所以單位不多，我們鎖定600萬以下(折扣後的價錢)的兩房單位。其實心目中是想買三房單位的，不過計過數後， 發現根本俾唔起首期。因為首期要俾樓價的30%，銀行借款70%，一個600萬的單位，首期就要180萬，加上要俾大約20萬印花稅，頭一筆至少要成200萬。而樓價多過6百萬，銀行一般都是最多借420萬，這就是我們鎖定600萬以下的單位既原因。
我們星期六睇示範單位，代理就在星期一幫我們交表 (我們一人一份申請表) ，星期五晚就抽籤。當晚已經知道結果， 星期六一早就揀樓…基本上，冇時間俾你詳細考慮。 我抽到88號，唔算後，可以在第二段時間揀樓，不過買到心水樓的機會只算一半半。
Next: B&B小窩居–買樓篇 (新樓)
No comments:
Post a Comment