[開箱文] Thermos 膳魔師真空煲 & 試煲湯包

上次永安大減價買嘅Thermos膳魔師真空煲終於開光啦！

事原係咁，個煲由上年等到今年先用，我比波生埋怨話個煲噤貴買番嚟，都唔用嚟煲湯嘅……比人話完，我立即乖乖試下煲湯！

4.5公升真空燜燒鍋(外携型)

4.5L內煲(外携型)

我買嘅係「4.5公升真空燜燒鍋(外携型) 」，sale姐姐推介話呢個4.5L外携型煲最多人買，好過個「座枱型」(比「外携型」價錢平$100)，外携型慳位得嚟又可以單手攞。 咁我就信阿姐，加上我阿媽都係用緊同一款，所以我就買咗「外携型」真空煲。 個真空煲有外煲和內煲，外煲用嚟保溫，而內煲係不銹鋼製造，可以直接用明火煲湯。

個煲原價$1788，永安大減價時賣$1299，另加送3公升內鍋(價值$460) 一個。

綠之聖嘅象牙椰子川貝湯包

湯包材料

今次用綠之聖嘅象牙椰子川貝湯包 (又係買咗好耐未開嘅湯包，之前有報道話D「川貝」係「平貝」嚟)，湯包材料包括川貝、象牙椰子、茯神、茨實、無花果乾、南杏、陳皮和蜜棗。 原本只要自已加豬展，不過我想湯甜d，同埋有湯渣食（我同波生當湯渣係一味餸），所以問咗我阿媽呢個湯可唔可以再加紅蘿蔔同合掌瓜，阿媽話可以，所以我就每樣各加2個。

我今次係朝早煲，煲大約20分鐘（其實最好煲30分鐘，不過我唔夠時間），之後將個內煲放入外真空煲，放工番屋企再開火煲多30分鐘就有得飲。 唔計煲水到滾時間，基本上，朝早太約花十分鐘就攪掂。

我嘅做法係咁嘅，早一日買定豬展，同埋準備定所有材料洗乾淨切好放雪櫃。 紅蘿蔔同合掌瓜早一日切好晒，豬展就朝早先出水。

今次煲湯算成功，雖然用真空煲煮，湯料全部都好出味，湯好甜，紅蘿蔔同合掌瓜都好夠淋。 不過今次落得太多水，倆個人飲，我煲咗4人份量。

用真空煲煲湯真係好方便，唔洗睇火，又慳能源。平日要番工，放工番屋企就有飲湯，真係好係好。 波生有飲湯，勁開心！  因為有湯渣食，所以我可以煮少煠餸，有時只另外煮咗煠菜就夠晒。

長遠嚟講，我會自己買料煲，湯包唔算平，D料比較少，同埋湯包通常都係煲藥材湯，我自己就比較喜歡瓜菜湯。

Facebook Page: 波太的簡單生活