波太的簡單生活 : 2018

Sunday, 4 November 2018

2018輕井澤+東北輕旅行~Day 2輕井沢一天遊(下)

27 May 2018 (Sun)

聖保羅天主教教堂(輕井澤教堂)

午飯後繼續踩單車，其實沿途都有些風景、店鋪、餐廳，不過我地都冇時間停車欣賞，一直踩到位於舊輕井澤銀座商店街旁的聖保羅天主教教堂(輕井澤教堂)。聖保羅天主教教堂，1935年由英國神父設立，Antonin Raymond設計。教堂以傾斜度大的三角形屋頂、大尖塔、清水混凝土而建成。教堂內部設計以木材為主，令人有一種寧靜的感覺。

公眾單車停車場入口

舊輕井澤銀座商店

舊輕井澤銀座商店街非常熱鬧，不過入去逛之前要先泊好單車，因為商店街係唔可以踩單車的。公眾單車停車場就係舊輕井澤環狀交叉路口的竹風堂與人氣名店三笠咖哩包中間條巷裡面，都唔難搵。商店街都幾好逛，好多鋪頭都有提供果醬試吃，不過我有試但係冇買，反而係”白樺堂”買咗2枝沙律汁同菓子做手信。

白樺堂

CAFE Green Star

離開商店街前，我地去咗一間樓上cafe 食tea 同休息一下，tea set 可以有蛋糕，另外可以飲茶或咖啡。間cafe得我地倆個人。休息完，又踩單車番去「白貓自行車」，五點前要還單車。還單車後就去王子outlet逛下，其實我對於行outlet冇咩興趣，不過一場黎到就參觀下，最後我都買咗一件衫。

Outlet中間有一大片草地，我見啲日本人好relax咁係草地到玩。

至於晚餐，我係tablelog搵咗一間食涮涮鍋ShabuShabu嘅餐廳「しゃぶしゃぶ愛宕」，由軽井沢駅行過去都係大約5分鐘。 Order咗兩款豚肉，豚肉入口即化。餐廳正對面就有間FamilyMart，去日本行便利店係指定動作，買完零食就番酒店，AHA酒店附近係冇便利店架!

しゃぶしゃぶ愛宕 : http://atago-karuizawa.jp/

星野接駁車時刻表：http://www.hoshino-area.jp/zh-tw/zh_access_shuttlebus

榆樹街小鎮：http://www.hoshino-area.jp/shop

Next: 2018輕井澤+東北輕旅行~Day 3青森港灣區半日遊

Previous: 2018輕井澤+東北輕旅行~Day 2輕井沢一天遊(上)

~住宿篇~

輕井澤(2晚) 輕井澤站前APA酒店＜軽井沢荘＞-->青森(1晚) HotelRoute-Inn Aomori Ekimae /ホテルルートイン青森駅前 -->奥入瀬渓流(1晚) 野の花焼山荘-->一関(1晚) Hotel Sunroute Ichinoseki/一關燦路都大飯店 - ->東京(2晚) Yaesu Terminal Hotel Tokyo/八重州東京站酒店

Facebook Page: 波太的簡單生活
我的敗家日誌 Mrs Shopping Diary 網購優惠分享

2018輕井澤+東北輕旅行~Day 2輕井沢一天遊(上)

27 May 2018 (Sun)

早餐

去旅行最緊要係一定要食早餐，食飽先有力行。我地一朝早到火車站對面的一間小cafe食個靚靚早餐，之後就出發輕井沢一天遊。

想到星野度假區，5月份「星野集團」免費接駁車的班次真係少得可憐，而且要先搭信濃鐵道到中輕井澤站，再搭乘接駁車。由於輕井沢的公共交通工具十分之不方便，所以我地決定踩單車到各個景點。

「白貓自行車」

今次就係大家都推介，位於APA酒店斜對面的「白貓自行車」租了電動單車，電動單車租金是1日￥1000。踩電動單車可以慳番唔少氣力，踩上星野果段就體會到電動單車比普通單車慳力好多。

雲場池

第一站係雲場池。雲場池園區前有一個小小的單車停車場，單車個胎有鎖，鎖住就唔怕俾人踩走。我地慢慢行咗雲場池一個圈，水好平靜，雖然唔係紅葉季節，但係我覺得翠綠色樹葉同綠色水中倒影都一樣靚。

之後就去星野度假區，不過上去段路程就一啲都唔太好踩，行人路不平，而且好多車，感覺有些危險。路上常看到的雪白色繡球花。

高原教會

石之教堂

到達星野度假區，其實我地都有些失望! 今日係星期日，剛好有婚禮在高原教會舉辦，工作人員唔俾遊客靠近，所以我地無緣進入內部參觀，看不到教堂內部。加上去到先發現石之教堂，原來星期日石之教堂開放時間係7:30a.m.-8:30a.m.，我地11點去到連教堂外面都睇唔到，浪費咗成大半個鐘先上到黎，點知好似冇咩睇到，有點兒失望。大家記住要check 清楚先好上去星野度假區。

榆樹街小鎮

又到午飯時間，我地就去咗「榆樹街小鎮」，遊客非常多，好多間餐廳都有條人龍係門口。食蕎麥麵的「川上庵」聽講好有名，眼見真係好多人排隊。我地好懶排隊，所以剛好有間西餐廳唔洗排隊，我地就立即入去(之後連呢間都要排)。今日天氣好好，唔算好熱，坐outdoor食lunch都好舒服。個野菜咖喱飯好好味，食到啲野菜真係好新鮮，白米粒粒都好飽滿，讚！之後就逛咗一陣就離開。

野菜咖喱飯

單車路線: 雲場池→ 星野度假區→ 聖保羅基督教會→ 舊輕井澤銀座商店街→車站

Next: 2018輕井澤+東北輕旅行~Day 2輕井沢一天遊(下)

Previous: 2018輕井澤+東北輕旅行~Day 1向輕井沢出發

~住宿篇~

Facebook Page: 波太的簡單生活
我的敗家日誌 Mrs Shopping Diary 網購優惠分享

Saturday, 3 November 2018

2018輕井澤+東北輕旅行~住宿篇(2) ~ ホテルルートイン青森駅前 (Hotel Route-Inn Aomori Ekimae)

青森站前Route-Inn酒店

青森站前Route-Inn酒店係正青森站前面，行2分鐘就到，唔洗辛苦搬行李。加上青森的主要景點都係青森站周圍，住這裡好方便。 Route-Inn係日本知名的連鎖酒店之一，之前係函館都住過同一集團的酒店。

LOBBY

雙人雙床房

浴室

酒店感覺比較舊，雙人雙床房間唔算大，不過基本設施都有齊。根據我朝早食早餐時所見，一般住客都係商務旅客，其實我唔覺有遊客，除了我和波生。

女生浴場

Check-in時，服務員給了我一個密碼，我才知道酒店原來有大浴場。女生浴場一定要按密碼才可以進入，不過我沒有去浸。我見沒有人，所以拍了張大浴場相。

另外，酒店為嚮應環保，只有夏天先會提供冷氣，五月唔會有冷氣，所以間房有些熱，不過間房個窗可以打開，重可以開到好大。我們打開窗瞓，空氣流通，瞓覺又唔覺得熱。

酒店餐廳

自助早餐

Rakuten Travel日本website (樂天)訂，房租13,250円(朝食付) 。

ホテルルートイン青森駅前:
https://www.route-inn.co.jp/search/hotel/index_hotel_id_65 ~住宿篇~

輕井澤(2晚) 輕井澤站前APA酒店＜軽井沢荘＞ --> 青森(1晚) Hotel Route-Inn Aomori Ekimae /ホテルルートイン青森駅前--> 奥入瀬渓流(1晚) 野の花焼山荘 --> 一関(1晚) Hotel Sunroute Ichinoseki/一關燦路都大飯店 --> 東京(2晚) Yaesu Terminal Hotel Tokyo/八重州東京站酒店

Facebook Page: 波太的簡單生活

Wednesday, 17 October 2018

2018輕井澤+東北輕旅行~Day 1向輕井沢出發

26 May 2018 (Sat)

今日搭早上十點機，輕輕鬆鬆坐的士到機場，比預期早到達機場，check in 前係太興食個早餐先。

今次係選搭日本航空，原因係近排港紙低，日本機票價格比上年貴了不少，日本航空和香港航空的機票價格差不多，所以我就選擇了前者（來回東京機票大約$3500）。

飛機餐

基本上我一上機就瞓，瞓到差唔多派餐我就醒。食完個餐我只睇了一套卡通片，其餘大部份時間我都係瞓。

可能比較多日本人坐日本航空公司，到達成田機場過關口，比以前少人，排咗一陣就過到關。之後到JR counter 換JR pass都一樣冇人，唔洗排隊，好快就攪掂個pass同book 埋NEX指定席。

東日本JR pass

我地坐NEX 去東京，再轉新幹線到輕井沢。今次張東日本JR pass，19000 yen，可以係14日內任用5天，好有彈性。所以同一日坐NEX 和新幹線，盡可能都安排到唔洗額外買火車票。東日本JR pass可以去到東北、信越地區，所以今次去東北之餘，都安排到輕井沢一天遊。 JR pass我係EGL 買，會有額外2-3%折扣，係香港買定會平1000yen。