2018輕井澤+東北輕旅行~Day 3青森港灣區半日遊

28 May 2018 (Mon) 

原來我打算坐9點幾果班新幹線去青森，可以他他條條咁出發，點知前晚波生問點解唔坐早啲啲嘅班次， 重話坐火車都大把時間瞓 ，不如早啲出發，早啲到達青森好過啦！所以今朝比我計劃早咗好多， 7點幾就check out，早餐就係車站嘅小店買飯糰，三文治上火車食。

  

雖然要坐成3個幾鐘差唔多4個鐘先到青森，不過我好眼瞓，大部分時間都係火車上瞓，APA酒店嘅床褥實在太”林”，呢兩晚都瞓得好辛苦，瞓到腰酸背痛。 所以話噤快就到達新青森，之後再轉車坐一個站到青森。 

新青森站

一到達青森， 青森俾我嘅第一印象係一個冇乜人嘅地方，係一個好靜嘅地方。 午飯時間，就係酒店旁邊一間餐廳食天婦羅飯。 

午飯餐廳

「睡魔之家 WA‧RASSE」博物館

紅色金屬條外觀嘅建築豈就係「睡魔之家 WA‧RASSE」博物館。 第一個景點就係去<睡魔之家~ WA‧RASSE>博物館睇下，睡魔之家係介紹青森於每年8月初舉辦嘅睡魔祭，展示祭典中出過場嘅大型睡魔燈籠。 我覺得好值得入場睇下，睡魔燈籠好大，手工好精細。 

「青森海灣大橋」跨越青森港，可以係A-factory附近嘅樓梯登上大橋，大橋係青森地標之一。 

A-factory

跟住就去A-factory， 不過都係買手信嘅地方， 原本想坐低食tea，不過呢到竟然冇蘋果批食，所以都係決定去「青森縣觀光物產館ASPAM」睇下。  

蘋果批專賣店pam pam

3款蘋果批

蘋果批~非常好食

去到三角形外觀嘅「青森縣觀光物產館ASPAM」，終於見到有間蘋果批專賣店pam pam， 我見有唔少日本人都係半打半打咁買。 我地就立即買咗兩款試下， 果然係非常好食，批皮低唔油好脆，蘋果批料唔會好甜，黎到青森一定要試下蘋果批! 「青森縣觀光物產館ASPAM」樓下有許多販賣蘋果相關產品嘅商店，13樓有個展望台，不過要收費，我地就冇去到。 

「りんご箱」餐廳

餐廳檯凳都係利用蘋果木箱做的

晚上嘅青森，更加少人!至於晚餐，我地就去咗位於Festival City AUGA的 「りんご箱」。 「りんご箱」 (中文即係”蘋果箱”)係一間好有青森特色嘅餐廳，餐廳裡面嘅檯凳都係利用蘋果木箱做嘅。其實就唔係幾好坐，因為張檯係由幾個蘋果木箱拼製而成，坐低會頂腳，不過就好有特色同埋好環保。 

 另外每日會有兩場”津軽三味線表演”( 12:45/19:00) ，三味線係日本的一種弦樂器，可以一邊享受美食，一邊欣賞表演，值得推介大家去「りんご箱」食晚餐。 

睡魔之家 WA‧RASSE博物館: http://www.nebuta.jp/warasse/foreign/hantai.html 

りんご箱: http://auga-ringobako.com/hp/

Next: 2018輕井澤+東北輕旅行~Day 4向十和田湖出發(上) ~八甲田山

Previous: 2018輕井澤+東北輕旅行~Day 2輕井沢一天遊(下) 

~住宿篇~

輕井澤(2晚) 輕井澤站前APA酒店＜軽井沢荘＞-->青森(1晚) HotelRoute-Inn Aomori Ekimae /ホテルルートイン青森駅前 -->奥入瀬渓流(1晚) 野の花 焼山荘-->一関(1晚) Hotel Sunroute Ichinoseki/一關燦路都大飯店 - ->東京(2晚) Yaesu Terminal Hotel Tokyo/八重州東京站酒店

Facebook Page: 波太的簡單生活 
我的敗家日誌 Mrs Shopping Diary 網購優惠分享