14 Oct 2023 (Sat)
好鬼懶又好忙，疫情後的遊記我都冇時間寫。 2021年，返新工之後就開始好忙，加上我又上多咗瑜伽堂，又要上八字班，所以真係冇晒時間。
年紀大，個人又hea 咗。 但以上通通都是借口嚟，年尾我要開始發力寫寫寫，等我老咗可以自己睇番。
2023年去了3次日本，年尾終於都可以歐遊，疫情後第一次歐遊決定要去波蘭！ 其實原本都驚驚地烏克蘭同俄羅斯打仗，會影響到波蘭，加上個個都同我講好危險叫我唔好去，所以我曾經一度擱置去波蘭旅行的決定。但後來因為我睇到VNL男排決賽都係喺波蘭舉行，令我覺得波蘭應該好安全，所以我又改變主意。
因為我幾年前睇了銀仔的blog（銀仔流浪記），令我有去波蘭旅行的念頭，如果冇covid，應該2020年就已經去咗。去邊到旅行，其實我哋都好隨意，諗到想去邊，我就會研究下果到方唔方便自由行。唯一條件就係要唔洗自駕，因為波生話唔識揸左呔車，佢話喺唔熟悉的地方揸唔熟悉的車會好危險(佢只接受到喺日本自駕遊，因為係右呔喎)。
不過，我覺得最主要唔想自駕的原因係...波生覺得有咩爽得過行完一個景點之後，個人攰攰地，跟住可以上車就瞓覺休息下。係呀～佢以為自己跟緊團呀? 當佢係車到好relax咁瞓緊，其實我就係到一眼關七，驚俾人偷嘢，又要睇住幾時落車!
波蘭旅行唔自駕都完全冇問題，可以搭火車、巴士、電車、的士。成日都有人問我，去歐洲唔自駕咪好辛苦囉，要自己搬行李搭車喎？ 講真，我都好憎搬行李，但旅行嘅嘢，都係睇你點plan！我唔會plan到個行程好似跟團咁，一日要去好多個景點。
我通常都係去得8日，去兩三個城市就夠，唔需要日日轉酒店。
自由行嘛，自己覺得舒服就好，唔係要同人鬥一次要去咗幾多個地方，或者要去幾多個國家。要知道，搭公共交通工具係我去旅行的其中一個景點黎，可以了解下當地人的生活嘛。
 |
| 翡翠拉麵小籠包 |
年紀大，個人真係好長氣。都係入番正題，今次乘搭Qatar 航空先到多哈，再轉機到華沙。星期五放工，返屋企冲涼就立即坐的士去機場。先到翡翠拉麵小籠包食晚餐，點咗個套餐，份量都不少。機場鋪頭好早收，我覺得機場先需要攪番個夜繽紛。
 |
| 飛機餐 |
機上提供的電影選擇唔多，飛機餐味道又好一般，所以我大部分時間都係瞓覺，坐零晨機嘅好處就係一上機就瞓（好彩瞓到）。
 |
| 中庭綠化區 |
機程8個幾鐘，瞓醒就已經差不多到達多哈。在機場逛了一圈後，就去咗burger king 食嘢，雖然轉機要等4個鐘，但時間都過得好快。機場中庭有個綠化區，我覺得幾靚，而且有好多人在地上瞓覺休息。
多哈機場上機要坐shuttle bus，這邊感覺有點混亂，
有點似去了廉航的Terminal。
又坐了5個幾鐘機，我又係一上機就瞓。話咁快就到達波蘭華沙啦～
Qatar $20,374 （兩張。一張機票要過萬蚊，好貴呀～）
00:25 to 04:05 (8h 40m) HKG → DOH
(Connection Time 4h 5m)
08:10 to 13:15 (6h 5m) DOH→ WAW
Previous:
No comments:
Post a Comment