15 Oct 2023 (Sun)
一早起身，在酒店食完個靚早餐就出門。我留意到波蘭人早餐鐘意食pastry類的食品，見佢哋不輪男女都會攞到成隻碟都係麪包、酥皮等食物。
今日去參觀維利奇卡鹽礦 (Muzeum ŻupKrakowskich - Kopalnia Soli)，坐巴士或者火車都可以到達，但坐巴士太易俾人偷嘢，所以我決定坐火車，加上我哋住正火車站對面，勁方便。 火車票是Krakow Glowny火車站counter 買的，車程約30分鐘就到達Wieliczka Rynek Kopalnia站，坐火車好方便，而且人唔多。
參觀鹽礦必須跟導賞團，我一早就在官網買了Tourist Route + Graduation Tower 的門票(Standard ticket: 122 PLN / person)，導賞語言是英文，導賞團時間是11am。 我哋比較早就到達鹽礦，所以先到Graduation Tower參觀。
 |
| Graduation Tower |
Graduation Tower是用木及樹枝等而建成，是製造鹽的地方。 鹽水brine會經過分層塔，流過樹枝，在樹枝分解成鹽霧。 整個建築物都充滿住鹽霧，而由brine 產生出來的鹽霧有療效作用，對呼吸系統以及皮膚都有幫助。 官方建議在graduation tower停留30分鐘，吸入鹽霧可以改善身體健康，提高免疫力。這個地方不大，半個鐘頭就行完。
 |
| 地下湖 |
鹽礦由13世紀開始開採，直到1996年才停止運作。其實鹽礦一共有九層，約327米深，目前只開放了最上三層供遊客參觀。 大家都好準時，提早15分鐘已經在英文團集合地方等，一夠鐘職員就會放大家入去。
首先要行幾百級樓梯落到第一個chamber ，深度為64米，我哋最深會落到深度130米。 鹽礦非常大，儼如一個巨大的地下城市，裡有房間、禮拜堂、地下湖泊等。
 |
| 聖金加教堂 |
 |
| 《最後的晚餐》的鹽雕 |
沿途會看到很多蠟像和石雕，紀錄了鹽礦發展歷史和幾百年前鹽礦工人的工作情況和生活方式。 最著名的景點就是聖金加教堂（St. Kinga's Chapel），教堂內有許多精美而細緻的鹽雕，其中有達文西最有名的畫作 《最後的晚餐》的鹽雕。（睇番鹽礦裡的照片，原來我影得好差，大部分都影到矇矇查查！）
 |
| 宴會廳 |
裡面還有個宴會廳，可以外借舉辦不同活動，例如婚禮等。
整個鹽礦都是用木材來支撐，木是最好的建材，因為不怕俾被鹽侵蝕。
 |
| 導賞團話自己係波蘭算係矮 |
導賞員的父親以前係鹽礦工人，佢話工人福利都唔錯，夠錢養大一家人，而且有一大筆退休金。 鹽礦工人一般都要身材矮小，方便在地底狹小的地方工作。 大部分波蘭人都非常高大，導賞員話自己都遺傳了父親的身高，生得比一般波蘭人矮。
 |
| 位置圖 - 可以清楚睇到導賞團的路線 |
 |
| 禮拜堂 |
導賞團全程約兩個鐘，導賞員話可以在最後一個景點解散，可以自己繼續行和自行決定幾時上返地面，坐lift就可以上返地面。
 |
| 地下餐廳 |
 |
| 坐lift就可以上返地面 |
我同波生就決定在地下餐廳食完午餐先上返地面，餐廳的食物都比較鹹，唔知是否落了好多鹽礦生產的鹽。 除了餐廳之外，仲有紀念品店，我買了一盒身體磨砂鹽，非常好用。
 |
| 身體磨砂鹽好用 |
個人認為波蘭人都行得好快，年紀大真係好難再跟這類導賞團去參觀鹽礦（之後去集中營跟團都是一樣行得好快），因為要行兩個鐘頭，基本上冇休息時間，中途只有個廁所位，總之大家跟住導賞員不停快行。
 |
| 裡面有售票機 |
火車站出面有間屋仔，裡面有部車票售賣機（唔好用出面果部售票機），可以買到車票，但其實火車上面一樣有部機可以買到車票。 我哋花了不少時間嘗試係火車站出面部機到買車票，但唔成功，應該係部機有問題，令到我哋走了一班車。後來發現波蘭大部分火車/巴士/電車上都有售票機，所以上車才買票都冇問題。
雖然我哋應該係淡季去波蘭旅行，但都係早一點預訂好門票，因為比較理想的時段都好快賣完。
Next: 2023-10 向波蘭出發 Day 2-2 克拉科夫舊城區 Krakow Stare Miasto
Previous: 2023-10 向波蘭出發 Day 1-2 一到華沙就遇扒手
No comments:
Post a Comment