18 Oct 2023 (Wed)
 |
| 路牌提示2h20m 到達Morskie Oko |
從公園入口到Morskie Oko 約 8 公里，有路牌提示約2個鐘頭20分鐘就會到達。 入口位置不遠，就有幾個流動廁所，雖然好嗅，但如果急都冇計要照去，中途會再有流動廁所。
跟著人群，沿著路一直走就可以，一定唔會迷路。慢慢行，欣賞下沿路的風景，其實都唔係辛苦，不過由於我平日根本唔會去行山，而且每日走路又唔多，要步行8公里，對於我黎講係好長途，感覺比較攰。
 |
| 流動廁所 |
 |
| 瀑布 |
一個鐘頭左右，見到有個瀑布。有路牌提示還有約1個鐘頭20分鐘就會到達目的地。
 |
| 捷徑 |
 |
我原以為行去個湖的道路應該大部分都係平路(其實我有這個想法係因為大家都講到好易行)，但實際要步行好多斜路上山，包括好多暗斜，行到我好攰。 中途有幾條捷徑，捷徑系類似樓梯級的路，條樓梯由好多大石砌成，這些大石唔係幾好行。 因為每級的高低差唔同，我行完之後覺得膝蓋好痛，之後我都係揀番行斜路。
 |
| 收費廁所 |
 |
| 小食亭 |
步行了大幾2個鐘頭，終於見到有個小食亭和正常廁所。見到個廁所，點都要去幫襯下， 事關我好怕廁所污糟，廁所收費4 PLN。
見到馬車停泊的地點，就知道終點在望，就快會見到個湖。
經過2個半鐘的腳程，終於到啦！見到綠色而且清澈的湖水，心情有少少興奮。
可以欣賞到壯麗的湖光山色，行2個半鐘都係好值得。
湖景好靚，一邊因為被太陽晒唔到，所以可以見到有積雪，另一邊被太陽晒到，仲係綠油油。相機鏡頭係無法將整座湖泊拍入鏡頭，大家要親身黎睇下，用自己對眼欣賞。
 |
| 湖邊小食亭 |
湖邊小食亭附近有排凳，我哋就坐低食午餐，食我今朝買的麵包、薯片同可樂。湖邊有好多雀仔，原本啲雀仔只是係我哋身邊飛來飛去，但原來佢哋一直都對我哋個午餐好有興趣，有一隻仲係波生手上搶走咗塊薯片。
我地在湖邊走了大約l/3圈就回程，原本波生想環繞個湖走一圈，但因為冇做功課，唔知道行個圈要多少時間，所以最後都冇行到 (之後上網睇番，網上話繞湖走一圈大約一個鐘)。
 |
小巴根本冇時間表，唔知道尾班車是幾點(下車時忘記了問小巴司機)。因為我怕遲咗會冇車返回Zakopane ，安全計都係4點前要回到起點搭車，所以我哋下午1點多就回程下山。
用了2個鐘返回起點，見到有小巴，立即跳上車休息。小巴開車時間很隨意，總之車滿就會開車。
下山時有少少後悔冇坐馬車下山，都話"上山容易落山難"，落山比上山更傷膝蓋，來回行了4個半小時，我的腳已經不是我的。 但當初唔想坐車馬係因為覺得馬仔們要拉成10幾人實在太辛苦，加上自己仲係年輕力壯(現實系已經人到中年)，可以自己行就唔應該坐馬車，所以只係空想，但最終都係唔會坐馬車。
去旅行真係要用好多體力，日日都行到腳仔軟，返到香港真係要好好鍛鍊下腳骨力。我當時係咁諗！
Next:
No comments:
Post a Comment