波太的簡單生活 : February 2017

Tuesday, 21 February 2017

[戀愛生活實習課] ~相愛六年

21 February 2017

跟波生一起, 不經不覺已經到了六個年頭。

以前，我根本冇諗過我會跟這樣的一個人在一起。

波生個人唔太細心，冇乜耐性，又從來冇送過我番屋企 ( 這個是重點！但係當時竟然無介意過，但現在想起覺得很過份)。

現在回想，當年應該係鬼掩眼。
倆個性格獨立的人，婚後生活少不免有好多磨擦，不過通常吵架都係為波生的屋企事。加上我本人可能天生敏感，好容易要為奶奶的說話而覺得唔開心。

波生屋企人係老派人，係親戚面前好要面，時時刻刻都要係親戚面前表現得父慈子孝，新抱又聽話，過年過節又要做禮。

最初真係覺得好難頂，用了兩年時間我先至開始適應，雖然到現在我都不大應同佢地的做法，不過現在我會盡量遷就。

好似過年咁，年初一，我地早上九點已經去到伯父屋企拜年，比伯父的親生仔和新抱更加早。我明白奶奶要求我地噤早去到，是想俾人知道她好有家教好有禮貌之類，所以一年一次就唔好計較。

我自己好幸運，我父母關心我地婚姻生活開唔開心，多過親戚點睇我地，唔洗我地做門面功夫。

要維繫一段婚姻真係唔容易，各有各期望，再加上對方父母的要求，少不免會產生好多磨擦，磨擦多就會令大家忘記了為何當初會走在一起。

我現在會用我的魔法棒，將波生的優點無限放大，將缺點無限縮細，接受大家都是不完美的。

沒有特別慶祝, 只買了兩件蛋糕回家慶祝!

Monday, 20 February 2017

[戀愛生活實習課] 結婚=幸福？

係未認識波生前，我曾經有諗過我可能會以後一個人。

唔係没人愛，只係一直未遇到我感覺合適的人。

年紀開始大，朋友一個個的結婚和生孩子，我還是一個人。朋友都開始為我著急，成日叫我快些找個伴侶，感覺女人的終極人生就係結婚。

但係緣份的事我無能力控制，遇不到就是遇不到，無理由迫自己跟一個不喜歡的人在一起，只為結婚而結婚！

雖然朋友是為我好，擔心我，但係一個人幸福與否，同有冇結婚其實係冇關係的。現在我結了婚，我更加可以肯定，女人的幸福不是男人賜給你。

中國人社會，通常會認為一位沒有結婚的女人就是不幸福。社會在不斷進步，但是這種女人要結婚的思想好像從沒有變過，包括我身邊的女友們。

其實有人愛，沒人愛都唔緊要，最緊要自己懂得愛自己。過自己喜歡的生活，發展自己的興趣，學習新事物。

舒淇: "一個人的時間要好好enjoy，因為你唔知幾時無得再一個人。"

好記得，有一年好似是情人節，電視台訪問當時自稱單身的舒淇怎樣過情人節之類，舒淇答，”一個人的時間要好好enjoy，因為你唔知幾時無得再一個人”。我非常應同舒淇這句話，我到現在都重好懷念我單身的日子，好 free，好慶幸我有一個人去過旅行。

人生除了愛情，重有好多其他的事情，一個女人的腦袋裡如果只有愛情和婚姻，多沒趣。

Thursday, 16 February 2017

[精神食糧] 我的倒頭栽人生~ 徐若瑄

首先，我一向都鐘意徐若瑄，因為佢又靚又叻。另外，我又好喜歡自傳類型嘅書籍，喜歡閱讀别人的經驗，學習别人面對困難的方法。好多時你覺得別人過比你好，其實係你只睇到別人好果面，人地背後嘅努力同負出，好多時唔會特別講你知。

這本書係講徐若瑄由14歲到40歲，出道26年來的人生。徐若瑄在書中分享了初為人妻及人母的心情點滴和踏入演藝圈的努力過程。特別喜歡徐若瑄話當遇到困難和挑戰時，佢會用V式幽默角度去面對，唔會放棄嘅果種態度。徐若瑄本身都就係一個勵志小故事。

隨書附贈的「鋼鐵V的健身課」。

By the way, 隨書附贈的化妝包quality 好一般。

link:

我的倒頭栽人生：從女孩14到女人40，鋼鐵V的勇敢筆記【隨書附贈：NEVER SAY NEVER！V式時尚獨家設計款化妝包】

Wednesday, 15 February 2017

放閃時間 ~ 情人節2017

今年二月十四情人節，老公波生又繼續送花俾我。我覺得波花送嘅花束一年靚過一年，可能佢嘅taste 好咗。其實我之前叫咗佢今年唔洗送花俾我，因為轉咗工，上司們都係女人，我諗住都係保持低調好，不過波生應該唔記得咗我講過唔好送。

唔想出去同人迫，所以我早一日提意不如係屋企食pizza 。

係Italian tomato 訂嘅情人節蛋糕。

Tuesday, 14 February 2017

舒緩鼻塞勁有效 ~ RC精油

我都好耐冇介紹精油，其實我一直都有繼續用Young Living 嘅精油、洗髮水、護髮素、body lotion和牙膏等等。係近幾個月香港Young Living推出咗好多新產品，之不過我好懶，唔得閑介紹。

最近瞓得唔好，因為就被傳染，患上了感冒。轉天氣，好多人感冒，抵抗力一差就被傳染。個鼻好塞，塞到晚晚瞓唔到。我知道Young Living 有枝精油叫RC，RC精油對於呼吸系統好有幫助，我就買枝試下 (現在的高級入門套Premium Starter Kit 多數都已經有支RC精油，我以前買的就冇RC)。

RC精油

RC係複方精油，含有藍按eucalyptus globulus、尤加利eucalyptus radiata、檸檬桉eucalyptus citriodora、香桃木myrtle、雲杉spruce、薄荷peppermint,、松木pine、薰衣草lavender、馬鬱藺Marjoram、絲柏cypress精油。

我係瞓前搽RC係胸口和頸(喉嚨位置)，亦都可以搽係背部，上床唔洗一陣就瞓著咗，我覺得RC對舒緩鼻塞真係勁有效，我係用2至3 滴RC精油加1/2泵 V-6 複方植物油 (V-6 Enhanced Vegetable Oil Complex)稀釋黎搽。另外可以加RC精油落精油擴香機，擴散30分鐘，對舒緩鼻塞真一樣有效。