2018-04-20 Friday
生日月，連續同不同朋友食飯慶祝，朋友們都勁忙，個個都要為仔女而忙，要幫仔女溫書考試做工課，有啲重要準備考小學，所以我地都唔係經常見面。
 |
| 生日飯@Ruby Tuesday |
上星期五，又約咗個朋友食生日飯，兩人見面又乜都講一餐。講到啲後生女同事都好主動，28歲已經趕結婚，拍一年拖已經主動同男朋友提出不如結婚云云……咁就令我地開始講番起年輕時，20幾歲嘅自己。
其實我一向都冇乜大志，2字開頭剛大學畢業嘅我重一度覺得如果有人願意娶我，又唔介意我婚後唔番工， 我一定會嫁俾佢。 因為果時大學同學都入到大公司，得我去到間細公司，人工唔高，我覺得份工冇前途，自己又唔知究竟鍾意做啲乜。大學時識嘅男朋友重因為咁開始睇唔起我，大家開始理念唔同，最終就一定分手啦!
都唔知好彩定唔好彩， 我果時遇唔到個願意養我嘅人。咁眼見同學畢業後都勁努力，自覺唔可以同人地相差太遠，所以我都開始努力工作，之後重俾我攞到個專業資格。不過一直冇比我遇到果個願意養我嘅人，啲追我嘅男仔重同我講，鍾意我獨立，唔洗人照顧……果時聽到個男仔咁講，我真係“吓”一聲。 完全唔係我想嘅，我係想個男人照顧我，我唔想獨立，我係俾迫㗎。
阿媽就同我講，你有能力照顧自己係好事，女人自己搵到錢，唔洗靠男人，幾多女人恨都恨唔到呀! 結咗婚都千期唔好唔做嘢，要問人攞錢洗好難㗎，難過自己打工去搵錢。 （提外話：我阿媽都係婚後冇停過工作，佢番寫字樓工，佢都係自己搵自己洗
。佢重話以前啲親戚見佢結咗婚重要番工， 覺得佢好慘。佢自己就一啲都唔覺得，佢唔想同社會脫節。）
去到28歲，我就開始諗通咗，人都係靠自己好，阿媽話齋，難得我有能力。到咗依家，
你話養我唔洗我做， 我都唔想， 我寧願番工。 事關我噤鐘意買嘢，自己搵錢自己洗，係我嘅女人的浪漫。 唔洗老公一個人搵錢噤大壓力，都不知幾好。
